भक्तपुर, फागुन १४ । प्रतिनिधिसभा निर्वाचनको सन्दर्भमा नेपाल मजदुर किसान पार्टी (नेमकिपा)ले भक्तपुर क्षेत्र नं. १ अन्तर्गत चाँगुनारायण नगरपालिका वडा नं. ३ झौखेलमा चुनावी सभा सम्पन्न गरेको छ। सभामा पार्टीका केन्द्रीय सचिव तथा प्रतिनिधिसभा सदस्यका उम्मेदवार प्रेम सुवालले आदर्श समाज निर्माणका लागि वैचारिक स्पष्टता, जनउत्तरदायित्व र नीतिगत प्रतिबद्धता अपरिहार्य रहेको धारणा व्यक्त गरे।
सभालाई सम्बोधन गर्दै सुवालले समाजवादी विचारधारामा आधारित राजनीतिक रूपान्तरण नेमकिपाको मूल लक्ष्य रहेको उल्लेख गरे। वर्तमान राजनीतिक अवस्थाको समीक्षा गर्दै शासक दलहरूको स्वार्थकेन्द्रित राजनीति, अवसरवाद र नीतिगत विचलनले देशलाई आर्थिक, राजनीतिक र नैतिक रूपमा कमजोर बनाएको आरोप लगाए। निर्वाचन केवल प्रतिनिधि चयन गर्ने औपचारिक प्रक्रिया मात्र नभई जनतालाई सही विचार, नीति र नेतृत्व छनोट गर्ने महत्वपूर्ण अवसर भएको धारणा राखे।
देशको भविष्य केवल भौतिक संरचना निर्माणले मात्र सुनिश्चित नहुने उल्लेख गर्दै वैचारिक स्पष्टता, नीतिगत प्रतिबद्धता र जनउत्तरदायित्वसहितको नेतृत्व आवश्यक रहेको बताए। नीति र सिद्धान्तविनाको विकास दीर्घकालीन रूपमा टिकाउ नहुने उनको भनाइ थियो।
निजीकरण र परनिर्भरताप्रति चिन्ता
जल, जमिन र जंगलजस्ता राष्ट्रिय सम्पत्तिमाथि बढ्दो निजीकरणको प्रवृत्तिप्रति चिन्ता व्यक्त गर्दै राष्ट्रिय स्रोतसाधन जनताको साझा सम्पत्ति भएको उल्लेख गरे। त्यस्ता स्रोत सीमित स्वार्थ समूहको नियन्त्रणमा पुग्नु राष्ट्रको दीर्घकालीन हितविपरीत हुने धारणा राखे।
विदेशी ऋणमा आधारित विकास मोडेल, असन्तुलित आर्थिक सम्झौता तथा आयातमुखी अर्थतन्त्रले देशलाई परनिर्भर बनाउने खतरा रहेको उल्लेख गर्दै आत्मनिर्भर अर्थतन्त्र निर्माण आवश्यक रहेको बताए। राष्ट्रिय हित, स्वाधीनता र जनकल्याणलाई केन्द्रमा राखेर नीति निर्माण गर्नुपर्ने आवश्यकता औंल्याए।
घोषणापत्र र व्यवहारबीचको प्रश्न
निर्वाचनका क्रममा उम्मेदवारहरूले नीति र सिद्धान्तभन्दा आकर्षक विकासका आश्वासन, व्यक्तिगत सम्बन्ध र अल्पकालीन लाभका आधारमा मत माग्ने प्रवृत्ति बढेको उल्लेख गरे। घोषणापत्रमा उल्लेख गरिएका नीति व्यवहारमा कार्यान्वयन गर्न सक्ने प्रतिबद्धता नै वास्तविक राजनीतिक परीक्षण हुने धारणा राखे। लोकतान्त्रिक संस्कृतिलाई सुदृढ बनाउन वैचारिक राजनीति र उत्तरदायी नेतृत्व अपरिहार्य रहेको बताए।
स्थानीय तहमा जनतामुखी कार्यक्रम
कार्यक्रममा नेमकिपा चाँगुनारायण नगर समितिका अध्यक्ष न्हुच्छेभक्त फोँजुले स्थानीय तहमा जनतामुखी कार्यक्रम सञ्चालन गर्ने प्रतिबद्धता व्यक्त गरे। ज्येष्ठ नागरिकका लागि आदर निकेतन स्थापना, बालबालिकाका लागि शिशुशाला सञ्चालन, शिक्षा र स्वास्थ्य सेवामा पहुँच विस्तार तथा सार्वजनिक सेवामा पारदर्शिता कायम गर्ने विषय प्राथमिकतामा रहेको जानकारी दिए।
विकासमा हुने पक्षपात, स्रोतसाधनको असमान वितरण तथा भ्रष्टाचार अन्त्य गर्न वैचारिक रूपमा स्पष्ट र उत्तरदायी नेतृत्व आवश्यक रहेको उल्लेख गरे।
स्थानीय नेता राजाराम दाहालले जनप्रतिनिधिहरू जनअपेक्षाअनुसार काम गर्न नसकेको उल्लेख गर्दै झौखेलवासीले स्थानीय सरकारको अनुभूति गर्न नसकेको धारणा राखे।
सभाका सञ्चालक कृष्णराम सुलुले कार्यक्रम सञ्चालन गरेका थिए भने हरिसुन्दर छुकाँले पार्टीको चुनावी घोषणापत्रमा समेटिएका विषयबारे जानकारी गराउँदै देश र जनताको निःस्वार्थ सेवा गर्ने राजनीतिक शक्तिलाई मत दिन आग्रह गरे।
कार्यक्रममा स्थानीय नेता, कार्यकर्ता, समर्थक तथा सर्वसाधारणको उल्लेख्य उपस्थिति रहेको थियो। निर्वाचन नजिकिँदै जाँदा भक्तपुर क्षेत्र नं. १ मा राजनीतिक दलहरूको गतिविधि तीव्र बन्दै गएको छ भने विभिन्न दलहरूले आफ्नो नीति, कार्यक्रम र दृष्टिकोण जनतामाझ प्रस्तुत गर्ने क्रम जारी रहेको छ।