आइतवार, मंसिर ७, २०८३

21.1 C
Bhaktapur
आइतवार, मंसिर ७, २०८३
21.1 C
Bhaktapur
HomeNews Contentचाँगुपत्रख्वप्रिङ एकेडेमीमा तिहार सांस्कृतिक तथा पुरस्कार वितरण कार्यक्रम

ख्वप्रिङ एकेडेमीमा तिहार सांस्कृतिक तथा पुरस्कार वितरण कार्यक्रम

भक्तपुर । चाडपर्व रमाइलो र मनोरञ्जनका अवसर मात्र होइनन्, ती समाजको इतिहास, पहिचान, परम्परा र पुस्तौँदेखि हस्तान्तरण हुँदै आएका मौलिक संस्कृतिका जीवन्त दस्तावेज पनि हुन्। यही सांस्कृतिक महत्त्वलाई आत्मसात् गर्दै ख्वप्रिङ एकेडेमी (इङ्लिस स्कुल) ले तिहार सांस्कृतिक तथा पुरस्कार वितरण कार्यक्रम आयोजना गरेको छ।
प्रा.डा. पुरुषोत्तम लोचन श्रेष्ठको प्रमुख आतिथ्यमा सम्पन्न कार्यक्रममा तिहारको मौलिकता संरक्षण, सांस्कृतिक मूल्यको पुस्तान्तरण र विद्यार्थीको प्रतिभा प्रोत्साहनलाई विशेष महत्त्व दिइएको थियो।
कार्यक्रममा प्रमुख अतिथि श्रेष्ठले नेपालीहरूको दोस्रो ठूलो चाड तिहारको ऐतिहासिक, सांस्कृतिक तथा सामाजिक महत्त्वमाथि प्रकाश पार्दै प्रत्येक चाडपर्वको आफ्नै इतिहास, किंवदन्ती र विशिष्ट पहिचान हुने बताउनुभयो। उहाँले तिहारलाई मौलिक स्वरूपमै मनाउनुपर्नेमा जोड दिँदै चाडपर्वका नाममा संस्कृतिमा विकृति भित्र्याउने गतिविधि उचित नहुने धारणा व्यक्त गर्नुभयो।
उहाँले हाम्रा चाडपर्वसँग जोडिएका किंवदन्ती, परम्परा र सांस्कृतिक कथाहरू नयाँ पुस्तालाई सुनाउने जिम्मेवारी अभिभावक तथा अग्रजहरूको भएको उल्लेख गर्नुभयो। पुर्खाले सिर्जना गरेका कला र संस्कृतिलाई केवल विगतको सम्पत्तिका रूपमा सीमित नराखी जीवन्त राख्दै भावी पुस्तामा हस्तान्तरण गर्नुपर्ने उहाँको भनाइ थियो। संस्कृतिको संरक्षण कुनै एक व्यक्ति वा संस्थाको मात्र जिम्मेवारी नभई सबैको साझा दायित्व भएको उहाँले स्पष्ट पार्नुभयो।
कार्यक्रममा संस्थागत विद्यालय सङ्घ भक्तपुर जिल्ला अध्यक्ष कृष्णराम त्वायनाबासुले बालबालिकाको समग्र विकासमा अभिभावकको भूमिका महत्त्वपूर्ण हुने बताउनुभयो। बालबालिकालाई गाली गरेर होइन, माया, सद्भाव र प्रेरणाका साथ सही मार्गमा अघि बढाउनुपर्ने उल्लेख गर्दै उहाँले विद्यालय र अभिभावकबीचको सहकार्य तथा समन्वयले मात्र उनीहरूको व्यक्तित्व विकासमा सकारात्मक परिणाम ल्याउन सक्ने बताउनुभयो।
विद्यालयका प्रिन्सिपल एवं कार्यक्रमका सभापति विनोद प्रजापतिले विद्यार्थीको पठन संस्कृतिको विकाससँगै उनीहरूको सर्वाङ्गीण विकासलाई विद्यालयले प्राथमिकतामा राख्दै आएको जानकारी दिनुभयो। उहाँले विद्यालयले सञ्चालन गर्दै आएका शैक्षिक गतिविधि, विद्यार्थीको उपलब्धि तथा विद्यालयको प्रगति प्रतिवेदन प्रस्तुत गर्नुभएको थियो। कार्यक्रमका संयोजक कृष्णसुन्दर प्रजापतिले स्वागत मन्तव्य व्यक्त गर्नुभएको थियो।

विद्यार्थीको उपलब्धिलाई सम्मान
कार्यक्रमको अर्को महत्त्वपूर्ण पक्ष विद्यार्थीको शैक्षिक उपलब्धि र अनुशासनको सम्मान थियो। शैक्षिक सत्र २०८२ मा कक्षा १ देखि ४ सम्म उत्कृष्ट जीपीए हासिल गर्न सफल विद्यार्थीहरूलाई पुरस्कृत गरिएको थियो।
त्यसैगरी, सन् २०२५ को ‘मोस्ट रेगुलर स्टुडेन्ट अफ द इयर’ बन्न सफल विद्यार्थी तथा २०८३ सालको विजयादशमीको अवसरमा पुरस्कृत हुन सफल विद्यार्थीहरूलाई प्रमुख अतिथि श्रेष्ठले पुरस्कार तथा पदक प्रदान गर्नुभएको थियो।
विद्यार्थीको मेहनत, नियमितता र शैक्षिक उपलब्धिलाई सम्मान गर्दै उनीहरूमा थप उत्साह र आत्मविश्वास अभिवृद्धि गर्ने उद्देश्यले पुरस्कार वितरण गरिएको विद्यालयले जनाएको छ।
समग्रमा कार्यक्रमले शिक्षा केवल पाठ्यपुस्तक र परीक्षाको उपलब्धिमा मात्र सीमित हुँदैन, यसले बालबालिकालाई आफ्नो समाज, इतिहास, संस्कृति र परम्परासँग जोड्न पनि उत्तिकै महत्त्वपूर्ण भूमिका खेल्नुपर्छ भन्ने सन्देश दिएको छ। संस्कृतिको संरक्षण र नयाँ पुस्ताको प्रतिभा विकासलाई सँगसँगै अघि बढाउने विद्यालयको प्रयासका रूपमा कार्यक्रमलाई लिन सकिन्छ।

LEAVE A REPLY

Please enter your comment!
Please enter your name here

सम्वन्धित समाचारहरू

यो हप्ता धेरै पढिएको